Suid-Afrikaanse Grand Prix

Die Suid-Afrikaanse Grand Prix was 'n motorwedren wat by die Kyalami Grand Prix-renbaan en voor dit by die Prins George-renbaan in Suid-Afrika plaasgevind het. Dit het in 1967 verskuif na die Kyalami Grand Prix-renbaan waar dit tot en met die laaste wedren in 1993 aangebied is.

Die eerste wedren vind in die jaar 1934 by die Prince George-renbaan in Oos-Londen plaas. Die Suid-Afrikaanse Grand Prix was aanvanklik as slegs 'n Grand Prix motorsportgeleentheid aangebied en het nie deel uitgemaak van die Formule Eenwêreldkampioenskap nie. Die Grand Prix is 33 keer gehou en het vanaf 1962 25 keer vir die Formule 1 wêreldkampioenskap getel. As gevolg van die Tweede Wêreldoorlog is die Grand Prix tydelik gestaak vanaf 1940 tot en met 1959. Dit het voorgegaan in 1960 tot dit weer in 1985 gestaak is weens boikotte deur die buiteland teen die regering se apartheidsbeleid. Na die einde van apartheid is daar nog twee laaste wedrenne in 1992 en 1993 gehou maar is weens die groot onkoste nie as winsgewend deur die koördineerders beskou nie. Daar is sedertdien nie weer 'n Suid-Afrikaanse Grand Prix aangebied nie.

In April 2018 het Adrian Scholtz, hoof- uitvoerende beampte van Motorsport Suid-Afrika, Suid-Afrika se moontlike terugkeer tot die Formule Een Grand Prix-kalender bespreek. Hy sê dat die belangrikste struikelblokke is die hoë koste vir die aanbied van so 'n geleentheid en die feit dat tans nie een van Suid-Afrika se renbane aan FIA se vereistes as gasheer van 'n Formule Eenren voldoen nie, hoewel Kyalami naby kom.^[1] Die moontlikheid van 'n Suid-Afrikaanse Grand Prix in Kaapstad of Durban is ook al bespreek.^[2][3][4]

In vroeg 2023 was 'n ooreenkoms oor 'n terugkeer van die Suid-Afrikaanse Grand Prix vir die 2024-seisoen amper klaar, maar in Junie 2023 het die FIA aangekondig dat die Suid-Afrikaanse Grand Prix in die nabye toekoms nie 'n terugkeer na die F1-kalender sal maak nie weens die Suid-Afrikaanse regering se standpunt oor Rusland se inval in Oekraïne.^[5]

1. ↑ (en) "Will South Africa ever host an F1 Grand Prix again?". The South African. 16 April 2018. Geargiveer vanaf die oorspronklike op 9 Augustus 2018. Besoek op 12 November 2018.
2. ↑ (en) "Formula 1 in Cape Town?". cometocapetown.com. Geargiveer vanaf die oorspronklike op 25 Junie 2017. Besoek op 12 November 2018.
3. ↑ (en) "Formula One in Cape Town". Cape Town Magazine. Geargiveer vanaf die oorspronklike op 4 Mei 2020. Besoek op 12 November 2018.
4. ↑ (en) "An F1 race in SA? Think again". Wheels 24. 6 Februarie 2018. Geargiveer vanaf die oorspronklike op 9 Oktober 2019. Besoek op 12 November 2018.
5. ↑ Charl Bosch (6 Junie 2023). "Kyalami Grand Prix officially non-starting over SA's stance on Russia". The Citizen. Besoek op 27 November 2024.